Mikið högg fyrir Grind­víkinga

Greint var frá meiðslum Arnórs Tristans í hlaðvarpsþættinum Boltinn lýgur ekki og sagt að hann yrði frá keppni í 3-6 mánuði.

Útlitið er þó ekki alveg svo slæmt, segir Arnór, en eftir nánari skoðun hjá lækni er talið að hann gæti mögulega snúið aftur eftir 6-8 vikur, og þá látið til sín taka í úrslitakeppninni.

„Það var talið að MCL liðbandið í hnénu væri slitið. Svo fékk ég nánari upplýsingar hjá lækni í Orkuhúsinu og var sagt að það liti bara út fyrir að vera illa tognað en ekki slitið. Svo er einhver áverki á krossbandinu. Maður er að horfa á 6-8 vikur en þetta gæti orðið lengra,“ segir Arnór og bendir á að ekki sé hægt að taka neina áhættu með krossbandið. Fréttirnar séu þó betri en hann óttaðist.

„Þetta eru mjög góðar fréttir. Maður hefði getað þurft að fara í aðgerð og verið frá keppni í 5-6 mánuði. Þetta verða í mesta lagi 2-3 mánuðir, þannig að ég er bara mjög sáttur. Þá fer ég alla vega heill inn í sumarið,“ segir Arnór en bætir við að hann telji mjög líklegt að hann verði með í úrslitakeppninni.

Þar ætla Grindvíkingar, sem eiga deildarmeistaratitilinn vísan, sér stóra hluti og Arnór er bjartsýnn:

„Ef við verðum allir heilir fyrir úrslitakeppnina, Óli og Kane eru búnir að vera tæpir, þá erum við með drullutraust lið. Sérstaklega með því að fá Pargo inn sem alvöru leikstjórnanda. Maður sér það bara á æfingum hvað það er meiri stjórn á öllu. Við erum mjög sterkir kandídatar.“