„Ekkert frá­bær körfuboltaleikur“

„Ég er gríðarlega sáttur með að sækja sigur hér í kvöld. Þetta var svona, að mér fannst allavega, ekkert frábær körfuboltaleikur. Bæði lið náðu ekki að spila eins vel í kvöld og þau geta. Ég er mjög sáttur með að finna stöðvanir og hitta þessi mikilvægu skot hér undir lokin til þess að ná í þennan sigur“ sagði Jakob strax að leik loknum.

Leikurinn var hnífjafn nánast allan tímann og alltaf þegar maður fékk það á tilfinninguna að annað liðið ætlaði að stinga af þá svaraði hitt. Jakob segir að undir lokin hafi hans lið náð að herða vörnina og finna stöðvanirnar sem þurfti. Þá hafi þriggja stiga skot, sem Toms Elvis Leimanis setti undir lokin, verið dýrmætt.

„Í svona leik sem er jafn og fram og til baka allan tímann þá fer auðvitað aðeins um mann. Það er lítið sem má út af að bregða til þess að maður lendi nokkrum stigum undir því þá er það strax orðið erfitt. Mér fannst við gera vel hér undir lokin, sérstaklega í seinasta leikhlutanum, þar náum við góðum stoppum sem landa þessu. Við vorum mjög þéttir varnarlega á þessum tímapunkti. Toms setur svo þennan stóra þrist niður á mikilvægum tímapunkti. Það kom okkur fjórum stigum yfir þegar lítið var eftir. Það var risastórt fyrir okkur. Það er oft sem að í svona jöfnum leikjum að þegar maður nær að setja niður skot á réttum tímapunkti og fá mómentið með sér á réttum tíma að þá er það nóg.“

KR-ingar hafa að skipa þeim Toms Elvis Leimanis, Linards Jaunzems og Rinalds Malmanis. Allir koma þeir frá Lettlandi og hafa reynst liðinu drjúgir svo vægt sé til orða tekið. Þeir Rinalds og Toms Elvis gengu báðir til liðs við KR nú í janúar. Hversu ánægður er Jakob með þetta lettneska tríó?

„Ég er gríðarlega ánægður með þá. Í fyrsta lagi þá eru þetta toppmenn, flottar persónur og mjög faglegir sem leikmenn. Þeir gera allt rétt, allt sem er beðið um og passa vel inn í hópinn. Þeir koma allir með eitthvað sérstakt að borðinu og ég er mjög ánægður með þá.“