Beitti hjartahnoði á fugl sem var skotinn niður í miðjum fót­bolta­leik

Þannig var það þegar tyrkneskur fótboltamaður lífgaði við rotaðan máf með hjartahnoði í miðjum leik.

Gani Catan, fyrirliði Istanbul Yurdum Spor, hikaði ekki við að beita hjartahnoði á fuglinn sem var svo óheppinn að markvörður liðsins skaut hann óvart niður í miðjum úrslitaleik.

Fyrirliðinn hljóp á staðinn, lífgaði fuglinn við og afhenti hann síðan sjúkraliðum liðsins til að hann fengi frekari læknisaðstoð.

Þrátt fyrir hetjulega björgunaraðgerð tapaði lið Catans úrslitaleiknum en hann tók tapinu ekki alltof illa.

„Það er dásamlegt að hafa hjálpað til við að bjarga lífi. Þetta var mikilvægara en meistaratitillinn,“ var haft eftir Gani Catan í tyrkneskum fjölmiðlum.