Björg­vin ekki af baki dottinn: „Bara eins lengi og mín er þörf“

Í fyrradag tilkynnti landsliðsþjálfarinn Snorri Steinn Guðjónsson íslenska hópinn fyrir leikina gegn Svíþjóð og greindi jafnframt frá því að Ísland myndi mæta Egyptalandi í fjórum leikjum á næstu mánuðum. Liðin eigast í tvígang við í Egyptalandi í maí og mætast svo í tveimur vináttulandsleikjum hér á landi fyrir heimsmeistaramótið í byrjun næsta árs.

Björgvin kom lítið við sögu á EM í janúar og fékk talsverða gagnrýni fyrir frammistöðu sína. Hann segir alltaf kúnst að ná sér niður eftir stórmót.

„Fyrstu vikurnar eftir stórmót eru mjög flóknar og svona einkennast af ákveðnum rússíbana, bæði jákvæðum og neikvæðum tilfinningum og sér í lagi eftir svona mót þar sem að þetta var mikill rússíbani. Þetta var frábært og erfitt og leiðinlegt og geggjað til skiptis. Tilfinningarnar koma heim með þér og svo kemurðu heim og áttar þig á því að það eru allir að horfa. Þetta skiptir alla máli þannig að hérna og það er ástæðan fyrir því að maður er í þessu,“ sagði Björgvin.

Hann verður 41 árs í maí og þrátt fyrir að vera aldursforseti íslenska hópsins er hann hvergi af baki dottinn. Björgvin segir að árangurinn á Evrópumótinu, þar sem íslenska liðið endaði í 4. sæti, veiti honum hvatningu að halda áfram að vera hluti af landsliðinu.

„Bara eins lengi og mín er þörf. Svo sérðu hérna á þessum blaðamannafundi að það er búið að teikna upp fram að næsta janúar. Þetta eru einhverjir sex leikir og það er svo stutt í næsta mót, þótt það sé alveg heilt ár næstum því, er það samt einhvern veginn bara innan seilingar. Það er alltaf þannig. Þú hefur aldrei tíma til að pæla í því hvað þú ert gamall eða hvað er búið að gerast,“ sagði Björgvin.

„Það eru bara næstu verkefni og næstu verkefni eru stór. Að spila hérna heima gegn Svíum, fyrir framan okkar fólk og svo eru það Egyptar í æfingaleikjum. Þeir eru frábært lið. Þetta er bara koll af kolli og maður hefur varla tíma til að melta það sem er að gerast. En maður meltir þetta og nýtur þessa tíma þegar hann er búinn. Þangað til er maður bara allur í þessu, slekkur á hausnum og spilar fyrir þjóðina og það er geggjað, sérstaklega á heimavelli.“

Björgvin vantar aðeins fjóra landsleiki í viðbót til að komast í hóp þeirra sem hafa spilað þrjú hundruð A-landsleiki eða fleiri fyrir Íslands hönd. Í þeim hópi eru Guðmundur Hrafnkelsson (407 landsleikir), Guðjón Valur Sigurðsson (365), Geir Sveinsson (340) og Ólafur Stefánsson (330).