Al­freð með skýrt svar: „Þeir verða að ráða fram­haldinu“

Þýskir miðlar spurðu Alfreð út í framtíðina í aðdraganda vináttulandsleikjanna við Afríkumeistara Egyptalands á morgun og sunnudag.

Alfreð hefur stýrt Þýskalandi frá árinu 2020 en samningur hans við þýska handknattleikssambandið rennur út eftir HM sem lýkur 31. janúar á næsta ári. Alfreð segir að boltinn sé nú hjá forkólfum sambandsins varðandi framhaldið.

„Ég hef aldrei farið leynt með það að ég vilji ekki hætta í handbolta strax eftir heimsmeistaramótið og myndi gjarnan vilja halda áfram að vinna með þessu liði,“ sagði Alfreð.

„Ég hef alltaf gefið til kynna að samningur minn renni út eftir HM og þeir verði að ákveða framhaldið. Ég mun sætta mig við þá ákvörðun,“ ítrekaði Alfreð.

Miðað við árangurinn síðustu ár ætti Alfreð, sem er 66 ára gamall, að vera í sterkri samningsstöðu en hann stýrði Þýskalandi til silfurverðlauna á EM í janúar og einnig til silfurverðlauna á Ólympíuleikunum í París 2024. Í bæði skiptin tapaði liðið gegn Danmörku í úrslitaleik. Í millitíðinni varð Þýskaland í 6. sæti á HM 2025.