Þórsarar stofna söfnunar­reikning vegna sektar KKÍ

Þórsarar voru ósáttir við að KKÍ hafi neitað að fresta leiknum sökum færðar og veðurs og sagði í yfirlýsingu stjórnar Þórs að félagið „harmi þau viðbrögð sem við fengum í þessu máli og það sem við upplifum sem algeran skort á skilningi á alvarleika aðstæðna og ábyrgð gagnvart öryggi leikmanna“.

Þór mun þurfa að greiða að lágmarki 300 þúsund krónur í sekt og þá var Selfossi úrskurðaður 20-0 sigur sökum þess að Þór mætti ekki til leiks.

„Það var farið eftir vinnureglum mótanefndar og öllu því sem félögunum hefur verið kynnt. Það voru nokkur hundruð bílar sem keyrðu þarna í gegn í gær,“ sagði Hannes S. Jónsson meðal annars um málið við Vísi í gær.

Þór hefur nú brugðið á það ráð að leita aðstoðar við að greiða sektina.

Í færslu á Instagram-síðu körfuknattleiksdeildar Þórs segir að fjölmargir hafi boðist til að aðstoða félagið við fjársektina og óskað eftir fleiri þátttakendum.

„Fjölmargir hafa óskað eftir því við okkur að um að leggja okkur lið við væntanlegri sektargreiðslu frá KKÍ. Við erum afar þakklát fyrir þann stuðning. Vertu með og skoraðu á 5 aðra að gera slíkt hið sama,“ segir í yfirlýsingu Þórs sem fylgir söfnunarreikningur.