„Ég var geggjuð skvísa, en það er ekki mér að þakka“

Í kaffispjalli um helgar er rætt við fólk í ólíkum störfum. Við spyrjum alltaf um hvenær fólk vaknar á morgnana, hvað það fyrsta sem það gerir þá og hvenær fer fólk að sofa. Við spyrjum líka um skipulagið og helstu verkefnin í vinnunni.

Hvenær vaknar þú á morgnana?

„Flesta virka daga vakna ég klukkan 6.30 og hendi í eina vél, gleymi kaffibollanum á kaffivélinni og dríf mig svo í Mjölni í þjálfun með mögnuðum konum sem kalla sig Jóhannsdætur. Hina dagana vakna ég á eðlilegum tíma með fjölskyldunni og við komum strákunum af stað í skólann, svo fer ég út að labba með hundinn okkar, Ása, ef veðrið er að hans skapi.“

Hvað er það fyrsta sem þú gerir á morgnana?

„Ég fæ mér góðan kaffibolla og fer yfir dagatalið og set niður verkefni dagsins. Stundum skrifa ég líka í dagbókina það helsta sem hefur verið í gangi síðustu daga.“

Á skalanum 0-10: Hversu mikil skvísa fannst þér þú vera á fermingardaginn?

Ég var geggjuð skvísa, en það er ekki mér að þakka. 

Ég er svo heppin að eiga hana Kristínu systur að sem er hárgreiðslukona með mjög háa tískuvitund, hún valdi fötin og greiddi mér. Þannig að ég er mjög ánægð með myndina enn í dag enda systir mín smekkmanneskja.“

Í hvaða verkefni ertu að vinna helst þessa dagana?

„Ég er að vinna að mínu eigin nýsköpunarfyrirtæki sem ég hlakka mikið til að kynna á næstunni, það er eitthvað sérstaklega gefandi við að búa eitthvað til frá grunni. Ég er líka með annan fótinn í hótelgeiranum og að skoða spennandi tækifæri þar með góðum hópi. 

Svo er ég í virkilega áhugaverðu hlutverki sem stjórnarkona í Bláa lóninu. Við vorum að ráða nýjan forstjóra, hana Sigríði Margréti og erum í miklum uppbyggingarfasa og stefnum á skráningu á markað á næstunni. Það er líka mjög gefandi og lærdómsríkt að fá að leiða Festu – miðstöð um sjálfbærni og Jafnvægisvogarráð. 

Ég brenn fyrir sjálfbærni og það er svo gaman að fá að vinna með fyrirtækjum og einstaklingum sem eru í fremstu röð á þessu sviði og ætla sér að skilja eftir betri heim fyrir komandi kynslóðir.“

Hvernig skipuleggur þú þig í vinnu?

Ég er mjög árangursdrifin og finnst mikilvægt að vera með skýra sýn og tengja markmið við sýnina og brjóta þau svo niður í litla áfanga þannig að ég sé alltaf að klára einhvern hluta af vegferðinni. 

Þannig upplifi ég að sýnin þokist nær og litla sigra á leiðinni.“

Hvenær ferðu að sofa á kvöldin?

„Það er mjög gott ef ég sofnuð fyrir klukkan tólf á miðnætti. Við erum með 7 og 15 ára nátthrafna hér á heimilinu sem eiga það til að halda okkur hjónum vakandi. Ég er líka stórnotandi á Storytel og við horfum oft á sjónvarpið uppi í rúmi, sem er alls ekki mælt með, þannig að það er ekki hægt að kenna börnunum um allt.“