Segir NBA Europe vera frá­bært tæki­færi fyrir körfu­bolta

FIBA Europe heldur stjórnarþing á Grand Hotel núna um helgina þar sem verið er að ræða bæði evrópskan og alþjóðlegan körfubolta.

„Ég er mjög ánægður að vera kominn hingað til Íslands,“ segir forseti FIBA Europe, Jorge Garbajosa, og er spenntur að skoða landið þess á milli að hann situr fundi stjórnarþingsins.

Garbajosa hefur tengingu við Ísland þar sem hann er gamall liðsfélagi Pavels Ermolinski. „Hann er frábær leikmaður. Ég fylgdist með honum þegar hann spilaði í Eurobasket með Íslandi árið 2015. Það var gaman að fylgjast með íslensku leikmönnunum og stuðningsmönnunum á því móti.“

Garbajosa segir árangur Íslands á stórmótum síðan þá hafa verið mjög góður.

„Það sem mér finnst mest spennandi núna er kvennakörfuboltinn,“ segir Garbajosa og nefnir að leikmenn og félög séu tilbúin að skuldbinda sig ásamt alþjóða körfuknattleikssamböndum til að stækka þann hluta íþróttarinnar.

Garbajosa segir að miklar breytingar séu á landslagi körfubolta í Evrópu og þeir þurfi að aðlagast þeim breytingum. Tillaga um að stofna nýja deild tengda NBA sem nefnist „NBA Europe“ er mjög spennandi hugmynd og getur stækkað körfubolta í Evrópu.

„Við erum með frekar skýrar kröfur ef það á að halda aðra keppni í Evrópu sem eru aðallega að virða landsliðsdagatalið og að félagslið fái tækifæri til að keppa um keppnisrétt í Evrópudeildum innan síns lands.“