Enginn mögu­leiki á meiri­hluta til vinstri sam­kvæmt nýrri könnun

RÚV greinir frá niðurstöðunum. Þar fær Sjálfstæðisflokkurinn átta fulltrúa í borgarstjórn og bætir við sig tveimur frá síðustu kosningum. Samfylkingin heldur sínum fimm fulltrúum en Vinstrið og Miðflokkurinn fá þrjá fulltrúa hvor. Viðreisn eykur fylgi sitt og fengi tvo borgarfulltrúa í stað eins. Sósíalistar mælast með einn en eru í dag með tvo.

Þá fer Framsóknarflokkurinn úr fjórum fulltrúum í einn, samkvæmt niðurstöðum könnunarinnar. Píratar missa alla sína þrjá fulltrúa og Flokkur fólksins mælist ekki inni en hann er með einn borgarfulltrúa í dag. Framboðin Góðan daginn og Okkar borg ná ekki heldur manni inn í borgarstjórn. 

Sjálfstæðisflokkur og Miðflokkur gætu unnið með Viðreisn eða Framsókn

Um er að ræða síðustu könnun Gallup fyrir kosningarnar en samkvæmt henni gætu Sjálfstæðisflokkurinn, Miðflokkurinn og Framsóknarflokkurinn myndað eins manns meirihluta eftir kosningar. Einnig gæti Sjálfstæðisflokkur myndað meirihluta með Miðflokki og Viðreisn þar sem flokkarnir mælast með 13 af 23 sætum í borgarstjórn.

Sjálfstæðisflokkurinn og Samfylkingin gætu einnig unnið saman með sína þrettán borgarfulltrúa. Ekki er möguleiki á meirihluta til vinstri miðað við niðurstöður könnunarinnar. Samfylkingin, Vinstrið, Sósíalistar og Viðreisn mælast samanlagt með ellefu borgarfulltrúa og vantar einn til að mynda meirihluta. Oddviti Framsóknar hefur útilokað samstarf með Samfylkingunni eftir kosningar.

Niðurstöðurnar eru úr net- og símakönnun sem Gallup gerði dagana 11. til 15. maí, að því er fram kemur í frétt RÚV. Úrtakið í netkönnuninni var tilviljunarúrtak úr Viðhorfahópi Gallup en úrtakið í símakönnuninni tilviljunarúrtak úr þjóðskrá. Heildarúrtaksstærð var 3.587 manns og náði til einstaklinga átján ára og eldri með lögheimili í Reykjavík. Þátttökuhlutfall var 41,3%.

Fréttin hefur verið uppfærð.