Grét alla Reykja­nes­brautina

Eftir að hafa verið afar nærri því að fagna Íslandsmeistaratitlinum síðustu tímabil og eftir allt sem undan er gengið í Grindavík tókst það loks í fyrrakvöld að landa Íslandsmeistaratitlinum.

Þetta hefur meiri þýðingu en aðeins hver annar titill.

„Mér hefur ekki liðið svona vel í tvö ár. Það er rosalega þungu fargi af manni létt,“ segir Ingibergur Þór Jónasson, fráfarandi formaður körfuknattleiksdeildar Grindavíkur í Sportpakkanum á Sýn.

„Þetta nær svo langt út fyrir parketið. Við erum búin að vera með vindinn í fangið sem samfélag allan þennan tíma, við að reyna að komast heim.“

Það hafi komi tímapunktar þar sem hefði verið hægt að gefast upp.

„Þegar maður sá hvað þetta gerði fyrir samfélagið og fyrir sjálfan mann, þá var eiginlega ekki aftur snúið. Það er eiginlega bara þannig. Það hefur veitt okkur þann kraft að hafa haldið áfram svona lengi,“ segir Ingibergur.

Missti föður sinn tveimur mánuðum áður en hann missti heimilið

Það hefur gengið á ýmsu frá rýmingu Grindavíkur í nóvember árið 2023. Ingibergur sagði þá í tilfinningaríku viðtali í Sportpakkanum á Sýn að hann hræddist að körfubolti í Grindavík myndi leggjast af.

„Ég hafði misst pabba minn í september og misst heimilið mitt tveimur mánuðum seinna. Ég lenti þá í rýmingu og grét í bílnum þegar ég keyrði brautina í bæinn,“

„Þannig leið mér bara þá. Ég var ekkert viss um að við færum aftur heim,“ segir Ingibergur.

Gleðitár í stað sorgartára

Gleðitár hafa nú komið í stað þeirra sorgartára.

„Ég var bara byrjaður að gráta þegar 3:30 voru eftir af leiknum. Ég einhvern veginn bara vissi það að við værum að fara að sigla þessu.“

Ingibergur er hættur sem formaður körfuknattleiksdeildarinnar. Er þetta ekki fullkomin leið til að kveðja?

„Já, ég held það. Nú þarf ég bara að fara að hlúa að fjölskyldunni minni og sjálfum mér. En já, þetta er fullkomin leið til þess að gera það.“

Ingibergur kom í töluvert lengra viðtal við Sýn sem má sjá í heild í spilaranum að neðan og einnig heyra í hlaðvarpinu Besta sætið á öllum helstu hlaðvarpsveitum.