Icelandair aflýsir fimm brott­förum í dag

Vísir hefur greint frá því að fella hefur þurft flugferðir niður á síðustu vikum vegna þess að ekki hefur tekist að fullmanna áhöfn. Þá hefur Icelandair einnig gripið til aðgerða til að bregðast við hækkandi eldsneytisverði og skorið niður flugáætlun sína á öðrum ársfjórðungi (apríl til júní) um tvö prósent.

Bogi Nils Bogason hefur sagt að margt bendi til að þær raskanir sem orðið hafa á flugáætlun félagsins vegna mönnunarvanda stafi af óformlegum aðgerðum flugmanna, sem eiga í kjaradeilu við félagið.

Deilan við flugmenn og flugvirkja komin til sáttasemjara

Samningar flugmanna, flugvirkja og flugfreyja hafa verið lausir frá september í fyrra og eru deilur bæði flugmanna og flugvirkja komnar á borð Ríkissáttasemjara. 

Ítarleg fréttaskýring um málið birtist á Vísi í gær:

Brottfarirnar sem um ræðir eru ferðir til Frankfurt, Stokkhólms, Berlínar, Portland í Oregon-ríki og Newark, við New York-borg. Í samtali við fréttastofu staðfestir Ásdís Ýr Pétursdóttir, forstöðumaður samskipta hjá Icelandair, að brottfarir til Berlínar og Stokkhólms sem aflýsa þurfti í morgun hafi verið vegna mönnunarvanda. Hinum ferðunum hafi verið aflýst vegna vélarskorts.

Brottfarartímar dreifast jafnt yfir daginn. Vél til Frankfurt átti að halda af stað laust fyrir klukkan eitt í nótt, Berlín og Stokkhólmur kl. 7:35 í morgun, Portland kl. 10:00 og Newark kl. 17:00 síðdegis. 

Hefur áhrif á hundruð farþega

Búast má við að þetta hafi áhrif á ferðaáætlanir hjá hundruðum farþega en þotur Icelandair taka flestar um það bil 160 til 190 farþega. Aðspurð segir Ásdís að vinna við að endurbóka farþega sé yfirstandandi. Bætt hafi verið kvöldflugi til Berlínar til að bregðast við vandanum. 

Vélaskortur skýrist af tveimur ástæðum

Ásdís segir vélaskortinn til kominn vegna viðhalds og seinkunar sem varð á afhendingu á nýrri Airbus-þotu. Sú átti að koma nú í vikunni en verður ekki komin í þjónustu fyrr en í byrjun júní. Sá vandi sem er tilkominn vegna viðhalds á vélum muni þó leysast á næstu dögum.

Ekkert liggur fyrir um hvenær deila Icelandair við flugmenn leysist.

Samkvæmt vef Isavia var flugum bæði til Stokkhólms og Færeyja aflýst í gær. Ásdís staðfestir við fréttastofu að ferðin til Færeyja hafi verið felld niður vegna veðurs og sú til Stokkhólms vegna vélaskorts.

Fréttin hefur verið uppfærð með frekari upplýsingum frá Ásdísi Ýr Pétursdóttur, forstöðumanni samskipta hjá Icelandair.