Tvö á slysa­deild eftir á­rás lausra hunda

Rétt eftir klukkan eitt í dag var maður, sem vill ekki láta nafns síns getið, úti að skokka ásamt vinkonu sinni í kringum Reynisvatn í Grafarholti þegar þau komu auga á tvo Border Collie-hunda sem hlupu um lausir. Hann segir frá því í samtali við blaðamann að þegar þau hafi reynt að skokka hægt fram hjá öðrum hundinum hafi hann urrað í áttina að þeim, stokkið svo á manninn og bitið til blóðs í fótlegginn.

Að sögn mannsinns var eigandi hundanna tveggja með þrjá hunda við vatnið og útskýrir maðurinn að hann og vinkona hans hafi kallað til hennar og beðið hana um að ná í hundana sína. Hún hafi þá sagst ekki geta tekið hundana, orðið dónaleg í svörum og einfaldlega ekki brugðist við af nægilegri festu að mati mannsins.

Stuttu seinna hafi hundarnir sprett að konu sem hafi einnig verið á göngu við vatnið og bitið hana aftan á ökklann en margir voru á svæðinu í dag enda frábært veður til útivistar. Þau tvö sem voru bitin fóru á slysadeildina en maðurinn fékk bæði stífkrampasprautu og sýklalyf. Það liggur ekki fyrir hvort konan hafi sömuleiðis þurft slíka meðferð.

Þá segir maðurinn frá því að þeir hafi einnig ráðist á annan hund og glefsað í hann en maðurinn sá ekki hversu illa fór fyrir hundinum sem ráðist var á.

Reyndu að flýja hundana

Border collie-hundar eru mjög oft þjálfaðir sem smalahundar en maðurinn, vinkona hans og konan sem var bitin áttuðu sig að sögn mannsins á því að þeir væru áfram líklegir til að bíta eða glefsa til þeirra ef þau myndu reyna að hlaupa af svæðinu. Þau hafi því brugðið á það ráð að bakka rólega frá hundunum sem hafi þá brugðist við með því að gera sig líklega til að ráðast aftur á þau, tekið spretti hvað eftir annað í átt að þeim, gelt ítrekað og verið ógnandi. 

Að sögn mannsins þurftu þau að hafa sig öll við og hrópa til að koma í veg fyrir að vera bitin aftur. Hundarnir hafi hlaupið áfram um svæðið og verið ógnandi áfram í um hálftíma en hann hringdi í lögreglu sem bar fljótt að garði og lögreglukona sem virtist vön hundum náði að klófesta hundana.

Hann segir þau þrjú, sig, vinkonu sína og konuna sem lenti einnig í því að vera bitin, hafa verið tekin í skýrslutöku en veit ekki hvernig fór með hundana og eiganda þeirra.