Á sama sviði og hetjurnar: „Verður ótrú­lega skemmti­legt að upp­lifa“

„Það er erfitt að lýsa því en þetta var bara tilfinning sem ég hafði yfir allan daginn. Að þetta væri góður daginn,“ segir Gunnlaugur Árni í samtali við íþróttadeild Sýnar um daginn örlagaríka þar sem að hann tryggði sér sæti á risamóti í fyrsta sinn.  

„Ég var bara að reyna halda mér í því mómenti. Hugsa þetta eins og þetta væri bara eitthvað sem væri nú þegar skrifað. Ætlaði mér bara að njóta þess að vera partur af því.“

Gott að fá högg í andlitið

Á lokaúrtökumótinu voru spilaðar 36 holur á einum og sama deginum, tveir hringir og fjögur sæti á U.S. Open í boði. Fyrri hringur af tveimur gekk eins og í sögu en strax á fyrstu holu á þeim seinni fékk Gunnlaugur tvöfaldan skolla. Í stað þess að láta það draga sig niður, tvíefldist kappinn, sótti þrjá fugla á næstu fjórum holum og öll vitum við hvernig sögunni lauk.

„Eftir á og í mómentinu hugsaði ég að þetta væri í raun það besta sem hefði geta komið fyrir. Að fá smá högg í andlitið. Fattaði að þetta væri ekki bara að fara vera á cruise control alla leið. Þetta gaf mér smá spark í því að sækja fugla. Þetta er svolítið þannig. Maður horfir á hverja einustu holu og reynir að finna leiðir til að fá fugl. Sóknargolf á hverri einustu holu. Það í rauninni var frábært að ég fékk smá bakslag, smá högg. Það hélt mér í sóknarhugarfarinu, lét mig vilja þetta meira.“

Kominn hinu megin við reipið

Plön breytast hratt, Gunnlaugur hefur slegið í gegn í Háskólagólfinu með liði LSU, er núna á leið á sitt fyrsta risamót,aðeins tvítugur, strax í næstu viku, þar sem hetjurnar hans, bestu kyflingar í heimi bíða. Menn á borð við Scottie Scheffler, sem er efsti kylfingur heimslistans, og Rory McIlroy sem hefur unnið öll þau risamót sem í boði eru. 

„Ég er einmitt spenntur fyrir því að upplifa það að vera í sama klefa og þeir. Að gera mig tilbúinn fyrir hring. Hvernig tilfinningarnar verða þegar maður er hliðina á einhverjum í klúbbhúsinu að borða eða hvað sem það er. Að vera allt í einu hinu megin við reipið. Maður ólst upp, var að dást að þessum kylfingum, þeir voru og eru enn þá fyrirmyndir. Að vera núna á sama sviði, keppa við þá á þessu móti, er eitthvað sem verður ótrúlega skemmtilegt að upplifa.“

„Get gert hvað sem ég vil í þessu móti“

Ef það er eitthvað sem einkennir Gunnlaug Árna þá er það hans frábæra hugarfar. Hann lætur ekki draga sig upp í skýjaborgir. Er með markmið og leiðina að því að ná þeim, aðlagar sig að aðstæðum. Fyrir hann er mikilvægt að muna að U.S. Open, þrátt fyrir að vera eitt stærsta og mest krefjandi mót í heimi, sé bara enn eitt golfmótið. 

„Núna þegar maður er að fara yfir endalaust af pælingu er varðar flug og plön, bóka gistingu fyrir mótið og annað þá er maður að fatta að við erum að fara í þetta mót. Svo á móti þarf maður líka að klípa sig og muna, þetta er bara annað golfmót. Jú þetta er á annari plánetu, hvað varðar stærð fyrir mig og Íslendinga en núna þarf maður að taka inn gleðina að hafa komið sér þangað. Svo um leið og maður mætir á keppnisstað þá er þetta bara golfmót. Þarf að undirbúa mig til þess að spila minn leik og gera mitt besta.

Ég veit að í lok dags, ef ég undirbý mig eins og fyrir hvert annað mót þá get ég gert hvað sem ég vil í þessu móti. Reyna taka eins mikið af góðum ákvörðunum og maður getur, undirbúa sig vel. Svo er það bara að spila gólf, íþróttina sem maður ólst upp við að spila.“

Sýnt verður beint frá U.S. Open risamótinu í golfi á sportrásum Sýnar. Mótið fer fram á Shinnecock Hills Golf Club vellinum í Southampton í New York fylki og hefst á fimmtudaginn í næstu viku.