Sonur Mark Hug­hes lést að­eins 38 ára gamall

Alex Hughes starfaði sem yfirmaður leikmannaumsjónar hjá enska fótboltafélaginu Grimsby. Félagið staðfestir andlát hins 38 ára gamla á eigin miðlum.

Fjölskyldan hefur einnig sent frá sér yfirlýsingu í gegnum Samtök knattspyrnustjóra.

„Við Jill erum algjörlega niðurbrotin vegna skyndilegs og óvænts fráfalls ástkærs sonar okkar, Alex,“ segir Mark Hughes í yfirlýsingunni.

„Alex var dásamlegur sonur, bróðir Curtis og Xennu, tryggur eiginmaður Jessicu og ástríkur faðir tveggja fallegra barna þeirra, Sebastians og Leonardos,“ bætir hann við.

Fjölskyldan biður um að einkalíf hennar sé virt á meðan hún reynir að vinna úr missinum.

Mark Hughes skapaði sér bæði nafn sem leikmaður og knattspyrnustjóri en hann var stjóri Carlisle United á síðasta tímabili eftir að hafa stýrt liðum eins og Manchester City, Fulham og Queens Park Rangers á árum áður.

Sem leikmaður lék Hughes um tíma með bæði Barcelona og Bayern München en lengst var hann hjá Manchester United. Hann var tvisvar enskur meistari og þrisvar enskur bikarmeistari með United og skoraði einnig bæði mörkin í úrslitaleik þegar liðið varð Evrópumeistari bikarhafa vorið 1991 eftir sigur á Barcelona.