Gera al­var­lega at­huga­semd við niður­rif á Sæ­braut

Hin tímabundna hjáleið á Sæbraut er nú til kynningar í skipulagsgátt en til stendur að reisa Sæbrautarstokk á eins kílómetra kafla frá mislægum gatnamótum Miklubrautar og Vesturlandsvegar og norður fyrir gatnamót Kleppsmýrarvegar og Skeiðarvogs. Í yfirlýsingu frá Gerðarsafni segir að safnið geri alvarlega athugasemd við fyrirætlanir um að gerð verði tímabundin hjáleið fyrir umferð á framkvæmdatíma þar sem iðnaðarhúsnæðið að Dugguvogi 42 er nú til húsa. Ástæðan er mikið menningarsögulegt gildi vegna listaverks Gerðar Helgadóttur sem steypt er í vesturvegg hússins, í níu hlutum og unnin var samhliða byggingu hússins 1971 til 1972. Brynja Sveinsdóttir forstöðumaður Gerðarsafns segir um að ræða sögulegt listaverk.

„Gerður hún er ótrúlega merkileg listakona og okkur í Gerðarsafni þykir náttúrulega gríðarlega mikilvægt að það sé verið að halda við verkum listakvenna frekar em að eyðileggja þau og ýta undir þau og sýna. Samkvæmt mínum upplýsingum er þetta líka að öllum líkindum fyrsta útilistaverkið sem er steypt beint inn í byggingu i Reykjavík.“

Brynja segir eðlilegt að fólk spyrji sig hvort ekki megi einfaldlega bara bjarga verkinu en rífa húsið?

„En það er ekki svo auðvelt að gera það, þetta er verk sem er steypt beint í húsið, þetta er lágmynd sem er steypt inn þegar húsið er í byggingu, þannig það er alls ekki víst að það verði hægt að bjarga því og eins er verkið mjög samofið húsinu sjálfu, það er gert fyrir upprunalega starfsemi hússins, þar sem þetta vísar í iðnaðinn á svæðinu, þetta vísar í iðnaðarsögu svæðisins alls.“

Hún segist vongóð um að hlustað verði á áhyggjur safnsins áður en húsið verði rifið. Hún segir mótsagnakenndar upplýsingar í samráðsgátt um framkvæmdirnar.

„Það er talað um að það sé verið að skoða leiðir til að breyta því eða viðhalda því en á öðrum stað er talað um að húsið og nærliggjandi hús séu látin víkja fyrir tímabundinni lausn fyrir umferð, þannig ég held það hljóti að vera hægt að finna betri lausn á þessu.“