„Ég fæ oft kaffi­bolla í rúmið og svo­leiðis stund er hei­lög!”

Í kaffispjalli um helgar er rætt við fólk í ólíkum störfum. Við spyrjum alltaf um það hvenær fólk vaknar á morgnana, hvað er það fyrsta sem það gerir þá og hvenær fólk fer að sofa. Við spyrjum líka um skipulagið og helstu verkefnin í vinnunni.

Hvenær vaknar þú á morgnana? 

„Ég vakna við útvarpsklukkuna klukkan sjö og er þá yfirleitt komin fljótlega í gang. Með fjórar ungar stúlkur og sprækan hund á heimilinu fyllist dagurinn fljótt af lífi.”

Hvað er það fyrsta sem þú gerir á morgnana?

„Ég fæ oft kaffibolla í rúmið og svoleiðis stund er heilög! Síðan þarf að ræsa stelpurnar og koma mannskapnum af stað út í daginn. Morgunrútínan er svolítið erfiðari á þessum bjartasta tíma ársins, það er gaman að leika úti á kvöldin og þess vegna er farið seinna í háttinn.

Tvo morgna í viku mætum við svo saman í einkaþjálfun, ég og maðurinn minn, sem er svona okkar dekur til að ná smá tíma saman.“

Ef þú værir karakter úr frægri bíómynd, hver værir þú þá?

„Erfið spurning en ég fékk góðan vin til að velja fyrir mig, sem sagði Kate Hudson í How to Lose a Guy in 10 Days. Ég get alveg tengt við ýmislegt drepfyndið sem gengur þar á og hvað hún fer stundum „all in“. Mér finnst líka skemmtilegt hvað hún tekur hlutunum með góðum húmor og svo er auðvitað alltaf gaman þegar allt endar vel.“

Í hvaða verkefni ertu að vinna helst í þessa dagana?

„Það er nóg um að vera hjá mér þessa dagana, bæði í fræðslumálum og ferlavinnu. ECIT-skólinn fyrir starfsmenn er stór hluti af því, ásamt ýmsu öðru spennandi sem snýr að þróun og umbótum innan fyrirtækisins. Við erum líka rúmlega 110 manna hópur og erum afar stolt af þeim öfluga og dýrmæta mannauði sem við höfum, sem gerir starfið bæði skemmtilegt og krefjandi.

Fyrir utan vinnuna er ég með persónulega gönguáskorun í gangi þar sem ég set mér markmið um hreyfingu og útiveru. Ég fæ oft hundinn okkar, Terrý, með mér út í náttúruna. Það er bæði góð hreyfing og líka frábær leið til að hlaða batteríin.“

Hvernig skipuleggur þú þig í vinnu?

Ég er nokkuð skipulögð – þótt ég geti stundum verið úti um allt! Dagatalið mitt er hins vegar lykilverkfæri, bæði í starfi og einkalífi, og þangað fer allt sem skiptir máli. 

Ef það kemst ekki í dagatalið er ólíklegt að það komist í framkvæmd.“

Hvenær ferðu að sofa á kvöldin?

„Fljótlega eftir að börnin fara að sofa tek ég smá „hreinsunarhring“ á heimilinu áður en ég fer sjálf upp í rúm. Yfirleitt er ég sofnuð um ellefuleytið en síðustu vikurnar hefur það þó dregist enda hugurinn önnum kafinn við brúðkaupsundirbúning. Það er reyndar mjög gaman að gleyma sér aðeins í svoleiðis pælingum… og á Pinterest flýgur tíminn ansi hratt.“