Sæti á risamóti í boði hjá Haraldi og Gunn­laugi

Opna breska meistaramótið fer fram á Royal Birkdale vellinum og hefst þann 16.júlí næstkomandi og á morgun fara fram fjögur lokaúrtökumót. 

Tuttugu sæti eru í boði á risamótið í gegnum lokaúrtökumótin en Opna breska meistaramótið er eitt af fjórum risamótum keppnistímabilsins í golfi ár hvert. 

Spilaðar verða 36 holur á einum og sama keppnisdeginum og munu efstu fimm kylfingarnir á hverju lokaúrtökumóti fyrir sig tryggja sér sæti á Opna breska meistaramótinu. 

Með reynsluna og sjálfstraustið í botni

Takist Haraldi Franklín að tryggja sér sæti í á Opna breska verður það í annað sinn á ferlinum sem hann keppir á risamótinu. Árið 2018 varð hann fyrsti Íslendingurinn til þess að spila á mótinu.  

Ætla má að Haraldur, sem hefur yfir lengri tíma verið einn af okkar bestu kylfingum, mæti með sjálfstraustið í botni til leiks á lokaúrtökumótinu á Dundonald Links á morgun en hann tryggði sér sæti á því móti með frábærri spilamennsku í undankeppninni á Enville golfvellinum fyrir viku síðan. 

Þar endaði Haraldur jafn í efsta sæti mótsins á sjö höggum undir pari þar sem að sex sæti voru í boði á lokaúrtökumóti morgundagsins. 

Fór svipaða leið fyrir ekki löngu síðan

Gunnlaugur Árni Sveinsson úr GKG mun einnig reyna að tryggja sér sæti á Opna breska á lokaúrtökumóti sem fram fer í West Lancashire á morgun. Takist honum það verður um að ræða annað risamót hans á árinu.

Þessi tvítugi háskólakylfingur úr LSU, sem er einn af bestu áhugakylfingum í heimi, náði frábærum árangri með því að tryggja sér sæti á Opna bandaríska meistaramótinu í gegnum lokaúrtökumót þar sem að úrslitin réðust í bráðabana

Á sjálfu risamótinu tókst Gunnlaugi Árna ekki að ná sínu besta fram en mætir reynslunni ríkari í lokaúrtökumót morgundagsins þar sem að hann reynir að tryggja sér eitt af þeim fimm sætum sem í boði eru, meðal annars við reynsluboltann Sergio Garcia .