Hvorki Haraldur né Gunnlaugur fara á Opna breska

Valur Páll Eiríksson skrifar 30. júní 2026 18:05

Haraldur Franklín Magnús og Gunnlaugur Árni Sveinsson verða ekki meðal keppenda á Opna breska meistaramótinu í golfi. Vísir/Samsett

Hvorki Haraldi Franklín Magnús né Gunnlaugi Árna Sveinssyni tókst að tryggja sér sæti á Opna breska meistaramótinu í golfi er þeir tóku þátt á lokaúrtökumótum fyrir komandi risamót í dag.

Fjögur 72 manna lokaúrtökumót fóru fram víðsvegar um Bretland í dag. Fimm efstu úr hverju móti fyrir sig fara inn á mótið.

Þeir Haraldur Franklín, sem er eini Íslendingurinn sem hefur tekið þátt á Opna breska, og Gunnlaugur Árni, sem keppti nýverið á Opna bandaríska meistaramótinu, fyrstur íslenskra karla, voru meðal keppenda á sitt hvoru mótinu.

Haraldur Franklín keppti á Dundonald Links-vellinum í Skotlandi þar sem leiknir voru tveir hringir. Haraldur var í vandræðum á fyrri hring dagsins þar sem hann lék á 81 höggi, níu höggum yfir pari vallar.

Ljóst var eftir þann hring að hann þyrfti einhverskonar kraftaverk til að komast áfram og þrátt fyrir að hafa leikið síðari hringinn feiknavel, á höggi undir pari, hafnaði hann í 35. sæti, á átta yfir pari í heildina.

Haraldur fer því ekki á mótið og það gerir Gunnlaugur Árni ekki heldur. Sá spilaði á West Lancshire-vellinum á Englandi. Hann lék fyrri hring dagsins á þremur höggum yfir pari, 75 höggum.

Á síðari hringnum fékk Gunnlaugur Árni fjóra fugla og tvo skolla og var því á tveimur höggum undir pari. Hann var því á einu yfir pari í heildina á hringjunum tveimur.

Það dugði þó aðeins fyrir 36. sæti þess móts og mun hann því ekki frekar en Haraldur vera meðal keppenda þegar Opna mótið fer fram 16.-19. júlí næstkomandi.

Opna breska