Ari á skotskónum þrátt fyrir tap

Elfsborg byrjaði sænsku úrvalsdeildina vel en hefur nú ekki unnið í síðustu fimm leikjum sænsku úrvalsdeildarinnar. Liðið mætti Hammarby í tólftu umferð sænsku úrvalsdeildarinnar í dag.

Hammarby var sterkari aðilinn í leiknum og skapaði nokkur hættuleg færi í fyrri hálfleik en náði ekki að nýta þau. Það var því markalaust í hálfleik.

Snemma í seinni hálfleik nær Paulos Abraham að skalla boltann í netið af stuttu færi og kemur Hammarby í verðskuldað forskot. Hammarby ætlaði að láta kné fylgja kviði og hélt áfram harðri sókn á mark Elfsborg eftir að hafa komist yfir.

Á 69. mínútu kom Ari Sigurpálsson inn á fyrir Elfsborg og ljóst var að liðið ætlaði að snúa vörn í sókn. Það tókst ekki strax og náði Hammarby að tvöfalda forystu sína með marki Montader Madjed fyrir utan teiginn.

Þrátt fyrir að vera 2-0 undir gafst Elfsborg ekki upp og ætlaði að jafna leikinn. Nokkrum mínútum eftir seinna mark Hammarby kemur sending inn á teig Hammarby. Þar var Ari Sigurpálsson og skaut boltanum viðstöðulaust í slánna og inn.

Þetta reyndist lokamark leiksins og vann Hammarby góðan 2-1 sigur. Eftir leikinn komst Hammarby í annað sæti sænsku úrvalsdeildarinnar með tuttugu stig. Elfsborg er í fjórða sæti með átján stig.