Dró sam­býlis­konu sína eftir jörðinni og beitti í­trekað of­beldi

Með brotum sínum var maðurinn sagður hafa endurtekið og á alvarlegan hátt ógnað lífi, heilsu og velferð konunnar.

Í fyrsta lagi var manninum gefið að sök að hafa slegið ítrekað í andlit konunnar utandyra. Svo hafi hann sparkað í hana, tekið hana hálstaki, kastað í jörðina, og svo dregið hana eftir jörðinni. Fyrir vikið hlaut konan ýmsa áverka og varð fyrir mikilli geðshræringu.

Maðurinn réðst síðan á konuna í lok janúar síðastliðins á heimili þeirra með því að taka harkalega undir kjálka hennar og háls og kreista, auk þess að slá hana í höfuðið, með þeim afleiðingum að hún hlaut mar á hálsi og áverka á höfði.

Í þriðja skiptið sló hann konuna með flötum lófa í andlitið, tók um höfuð hennar og þrýsti því upp að hörðu yfirborði með þeim afleiðingum að hún rak höfuðið í og hlaut áverka, auk þess sem hann tók hana hálstaki. Fyrir vikið hlaut konan kúlu á enni, sár á nefi, gat og blæðingu á hægri hljóðhimnu, gripför á hálsi og marbletti víðs vegar um líkamann.

Auk þess var maðurinn ákærður fyrir umferðarlagabrot.

Hann játaði sök. Við ákvörðun refsingar var litið til þess að hann hefur áður hlotið dóm, þriggja ára fangelsi frá Landsrétti.

Líkt og áður segir hlaut hann eins árs fangelsisdóm. Þá er honum gert að greiða konunni 4,4 milljónir króna í bætur og 2,7 milljónir í málskostnað.