Eykur strand­veiðikvótann um 964 tonn

Í fréttatilkynningu þess efnis segir að með breytingunni sé aflamark þorsks til strandveiða aukið um 964 tonn, úr 13.350 tonnum í 14.314 tonn. Með þessu nemi heildarafli sem úthlutað verður til strandveiða upp úr sjó 15.664 tonnum árið 2026.

Önnur aukningin í sumar

Þetta er í annað sinn í sumar sem innviðaráðherra tilkynnir um aukningu strandveiðiafla. Í júní var aflamark þorsks hækkað um 2.700 tonn.

Í tilkynningu segir að aukningin eigi rætur að rekja til niðurstöðu skiptimarkaðar með aflaheimildir. Samkvæmt lögum um stjórn fiskveiða séu 5,3 prósent af leyfðum heildarafla í hverri tegund dregin frá og þeim aflaheimildum ráðstafað til tiltekinna úrræða, þar á meðal strandveiða, byggðakvóta, línuívilnunar og fleira.

Meira en reiknað var með

Tegundasamsetning þess afla sem dreginn er frá svari ekki alltaf til þeirra tegunda sem úrræðin kalla á og ráðherra sé því heimilt að skipta aflamagninu í aðrar tegundir á skiptimarkaði.

Niðurstaða skiptimarkaðarins hafi skilað meiri þorskaflaheimildum en gert var ráð fyrir í fyrri áætlun og viðbótin nemi tæpum 964 tonnum af óslægðum þorski.

„Stórkostlegur áfangasigur“

Inga segir í samtali við fréttastofu að tæplega 1000 tonna aukning strandveiðipottsins sé stórkostlegur áfangasigur fyrir sjávarpláss landsins og strandveiðimenn.

„Þetta er náttúrulega eitt helsta baráttumál Flokks fólksins. Við lögðum þetta á stjórnarmyndunarborðið á sínum tíma, að reyna að tryggja 48 daga strandveiðar. Það hefur nú hikstað en farið mjög vel af stað. Í fyrra var flotinn kallaður heim í land 12. júlí og nú þegar erum við að verða komin með ríflega mánuð umfram það. Þannig að núna, við eigum enn eftir á fjórða hundrað tonna af þegar útgefnum aflaheimildum og nú bætum við tæplega þúsund tonnum við. Þannig að vonir standa til þess að við náum hátt í 48 daga.“

Ólánskerfi

Nú eigi eftir að koma í ljós hversu vel muni ganga að ná í þessi tæplega 1400 tonn sem eftir eru í pottinum en það fari eftir aflagæftum og öðru slíku.

„En vertíðin er stórkostleg. Þetta er langöflugasta strandveiðivertíð frá upphafi þessa ólánskerfis, eins og ég vil kalla þetta kerfi. Þetta er mesta aflaverðmæti sem nokkurn tímann hefur verið greitt fyrir aflann okkar. Við erum að fá hér að meðaltali vel yfir 600 krónur fyrir kílóið, meira og minna í allt sumar og í gær sem dæmi þá var kílóið á markaðnum af óslægðum þorski um 684 krónur.“