Stór­sigur hjá Magdeburg og svekkjandi jafn­tefli í Dan­mörku

Lið Magdeburgar var í engum vandræðum með svissneska liðið þar sem liðið missti aldrei niður forystu leiksins. Eftir nokkra góða spretti var Magdeburg komið í níu marka forskot í hálfleik og var þá leikurinn nánast búinn.

Í seinni hálfleiknum passaði Magdeburg að heimamennirnir myndu ekki nálgast þá og héldu sama mun milli liðanna allan leikinn. Sókn Magdeburg var frábær þar sem ekki á hverjum degi nær lið að skora 39 mörk í einum leik.

Mörkunum var vel dreift milli leikmanna þar sem fjórir leikmenn í Magdeburg voru með fimm mörk. Gísli Þorgeir Kristjánsson var ekki langt frá þeim en hann skoraði fjögur mörk. Ómar Ingi Magnússon tók því rólega í dag og skoraði aðeins eitt mark.

Æsispennandi jafntefli

Kristján Kristjánsson, einnig þekktur sem Donni, spilaði stórt hlutverk þegar lið hans SAH – Aarhus tók á móti Dinamo Bucuresti frá Rúmeníu. Leikurinn var jafn allan fyrri hálfleikinn og var SAH undir með einu marki þegar flautað var til hálfleiks.

Mikil spenna var í leiknum og reyndu bæði lið að ná forystunni en hvorugt liðið náði að stinga hitt af. Síðustu mínútur leiksins reyndu bæði lið að koma sigurmarkinu inn en það gekk erfiðlega og klúðruðu bæði liðin sínum færum og endaði leikurinn með 25-25 jafntefli.

Emil Buhl Lærke, liðsfélagi Donna, var markahæsti leikmaður leiksins en það gekk erfiðlega fyrir Donna að nýta færin sín. Hann tók þrettán skot en náði aðeins að skora tvö mörk. Hann var því aðeins með fimmtán prósent skotnýtingu.