Far­þegi hand­tekinn í Hollandi vegna skemmdarverka

Þetta staðfestir Ásdís Ýr Pétursdóttir, forstöðumaður samskipta hjá Icelandair, í samtali við fréttastofu. RÚV greindi fyrst frá. 

Ásdís segir í samtali við fréttastofu að óstýrlátur farþegi hafi látið öllum illum látum um borð. 

„Hegðun viðkomandi var með þeim hætti að kallað var til lögreglu sem tók á móti honum í Amsterdam,“ segir hún og tekur fram að skemmdir hafi orðið á innréttingu vélarinnar. Nánar tiltekið olli farþeginn skemmdum í sætaröð sinni.

Ásdís gat ekki veitt upplýsingar um hvort maðurinn hafi verið í annarlegu ástandi eða hvort að um íslenskan ríkisborgara hafi verið að ræða. Ekki liggur fyrir hvort maðurinn hafi átt í útistöðum við aðra farþega eða starfsfólk.

„Það er auðvitað óþægilegt þegar svona gerist. Væntanlega er verið að gera við þessar skemmdir núna. Skemmdirnar höfðu ekki áhrif á flugið til baka, það þurfti að skoða vélina og það olli smá seinkun.“

Tafir urðu á heimferð vélarinnar vegna málsins. Samkvæmt frétt RÚV er málið til rannsóknar hjá lögreglunni í Hollandi.