Búa í „hel­víti á jörðu“ og borða ill­gresi til að halda lífi

Rússar eru sagðir hafa umkringt bæinn með jarðsprengjum.

Ráðamenn í Úkraínu óttast um líf þessa fólks, sem talið er að séu um tvö þúsund talsins. Rússar eru sagðir meina fólkinu að yfirgefa bæinn og hafa rússneskir hermenn birt myndefni af líkum fólks við jarðar borgarinnar. Fólkið er talið hafa reynt að flýja frá Oleshky.

Michael O‘Flaherty, yfirmaður mannréttindamála hjá framkvæmdastjórn Evrópusambandsins, lýsti á dögunum yfir áhyggjum vegna ástandsins. Hann sagði íbúa í bráðri hættu og sagði að það væri á höndum Rússa að útvega fólkinu sem það hefði hernumið matvæli og aðrar nauðsynjar.

Andrii Sybiha, utanríkisráðherra Úkraínu, vakti einnig athygli á ástandinu á allsherjarþingi Sameinuðu þjóðanna í síðustu viku. Sakaði hann Rússa um að vera að svelta íbúa Oleshky til dauða með vísvitandi hætti.

Úkraínumenn notuðu um helgina dróna til að flytja mat og aðrar nauðsynjar til bæjarins, sem er sunnan megin við Dnipró og þar af leiðandi á yfirráðasvæði Rússa.

Forsvarsmenn hersins segjast hafa flutt um fjögur tonn af mat til bæjarins en óljóst sé hversu mikið af því endaði í höndum rússneskra hermanna, samkvæmt frétt Guardian.

Fyrr í mánuðinum viðurkenndi Dmitrí Peskóv, talsmaður Vladimírs Pútín, að ástandið í bænum væri alvarlegt. Hann sakaði þó Úkraínumenn um að bera ábyrgð á stöðunni. Þeir væru að stöðva sendingar nauðsynja til íbúa bæjarins.

Í skilaboðum til blaðamanna Guardian segja íbúar að staðan sé gífurlega alvarleg. Þau borði eina máltíð á dag, sem sé yfirleitt súpa sem gerð sé með jurtum sem finnast í blómapottum í bænum og illgresi.

Bannað að grafa lík íbúa

Blaðamenn BBC hafa einnig náð að ræða við íbúa Oleshky. Ein kona sagði íbúa undir linnulausum árásum. Vísaði hún til þess að hjón sem hún þekkti hefðu farið til nágrannabæjar að verða sér úti um mat. Þeim hafi tekist það en ekki tekist að snúa aftur áður en útgöngubann sem Rússar hafa sett á fór í gildi.

Hjónin voru drepin með sjálfsprengidrónum á leið þeirra inn í bæinn. Blaðamenn BBC segjast hafa heyrt margar sambærilegar sögur frá Oleshky.

Haft er eftir sérfræðingum Sameinuðu þjóðanna að þeir hafi staðfest að minnsta kosti 29 dauðsföll óbreyttra borgara í Oleshky á þessu ári. Að minnsta kosti 54 eru sagðir hafa særst. Heimamenn segja raunverulega fjöldann mun hærri.

Þá segja íbúar að Rússar hafi meinað þeim að grafa fólk sem deyr í bænum, nema það deyi af náttúrulegum orsökum. Ein kona sem ræddi við blaðamenn segir að í einhverjum tilfellum hafi lík legið á götum bæjarins frá því í desember. Í frétt BBC segir að þetta hafi verið staðfest með mjög grófum myndum sem blaðamennirnir hafi fengið sendar.