Bang & Olufsen snýr aftur til landsins

Á morgun opnar ný verslun í Reykjavík sem selur Bang & Olufsen vörur en slíkar vörur hafa ekki verið seldar á Íslandi um nokkurt skeið. Vörurnar frá Bang & Olufsen urðu að ákveðnu stöðutákni á Íslandi fyrir hrun og seldust gríðarlega vel.

Bang & Olufsen er danskt fyrirtæki sem framleiðir hágæða raftæki á borð við hljómtæki og sjónvörp. Árin fyrir hrun voru landsmenn vitlausir í Bang & Olufsen vörur en Ísland var í 2. sæti á heimslista yfir sölu á Bang & Olufsen raftækjum, aðeins Rússar keyptu fleiri.

Eftir hrun hægðist þó verulega á sölu á vörum frá þessu vörumerki og fór svo á endanum að versluninni sem seldi Bang & Olufsen vörur hér á landi var lokað árið 2011, sama ár og félagið sem fór með eignarhald á verslunni varð gjaldþrota.

Tækjaóðir landsmenn geta því tekið gleði sína á ný en Ormsson mun hefja sölu á raftækjum frá Bang & Olufsen á morgun. Líkt og fram kemur í fréttatilkynningu frá fyrirtækinu virðist hvergi vera til sparað en sérstakur hönnuður á vegum Bang & Olufsen kom til landsins til þess að hanna verslunina.

„Við teljum að það sé markaður fyrir Bang & Olufsen á Íslandi í dag“ segir Einar Þór Magnússon framkvæmdastjóri Ormsson.

Bang & Olufsen vörur eru yfirleitt í dýrari kantinum en í Danmörku má t.d. fá 55 tommu sjónvarp frá fyrirtækinu fyrir litlar 62.995 danskar krónur, rúmlega 1,2 milljónir íslenskra króna. Einar Þór óttast þó ekki að Íslendingum finnist vörur danska fyrirtækisins of dýrar.



„Þeir hafa þróað sínar vörur áfram þannig að verðin eru orðin nær samkeppninni.“