ÁTVR segir upp og sparar 150 milljónir

Í tilkynningu þess efnis segir að ÁTVR hafi undanfarið unnið að skipulagsbreytingum í þeim tilgangi að auka hagkvæmni í rekstri, bregðast við minnkandi sölu og laga skipulag og ábyrgðarsvið að nýrri stefnu fyrirtækisins. Breytingarnar séu jafnframt liður í að mæta kröfu fjármála- og efnahagsráðuneytisins um hagræðingu í rekstri.

Með breytingunum verði sviðum fyrirtækisins fækkað og ein staða framkvæmdastjóra lögð niður. Jafnframt verði stöðugildum á skrifstofu og í dreifingarmiðstöð fækkað um tæplega sex og ekki verði ráðið í allar lausar stöður næstu misserin.

Áætlað sé að skipulagsbreytingarnar, ásamt öðrum hagræðingaraðgerðum, skili um 150 milljóna króna árlegum sparnaði þegar þær hafa komið að fullu til framkvæmda.

ÁTVR hafi frá árinu 2020 unnið markvisst að því að hagræða í rekstri og laga starfsemina að breyttum aðstæðum. Með þeim breytingum sem nú hafa verið gerðar hafi stöðugildum fækkað úr 356 í 292, eða um 18 prósent á tímabilinu.