Draumahelgin

Viktor Arnar Ingólfsson, rithöfundur og tæknifræðingur, myndi eyða draumahelginni fyrir vestan. "Ég myndi byrja ferðalagið á að aka vestur á Snæfellsnes síðdegis á föstudegi. Ég á rætur að rekja vestur á land en hef ekki verið nógu mikið þar og myndi því grípa tækifærið. Konan og dæturnar kæmu að sjálfsögðu með og við myndum gista á Hótel Búðum. Ég hef ekki ennþá fengið tækifæri til að heimsækja Búðir eftir að nýja hótelið hóf rekstur en ég hef heyrt látið vel af því. Þessu fylgir auðvitað göngutúr í nágrenninu og góður kvöldverður. Á laugardeginum vil ég fara í Stykkishólm og fara í fuglaskoðunarferð með Sæferðum. Ferðirnar taka tvær og hálfa klukkustund og það er svo margt að sjá. Ungarnir eru komnir úr eggjunum og allt iðandi af fugli. Eyjarnar sjálfar eru líka heillandi og þar má sjá margar óvenjulegar jarðfræðimyndanir. Ef þannig stendur á sjávarföllum má sjá að straumarnir milli eyjanna á sundunum eru alveg stórmerkilegir. Skipverjar eru líka vanir að veiða dálítið af skelfiski og bjóða farþegum hann beint úr skelinni. Nóttinni vil ég eyða á Hótel Stykkishólmi og fara síðan snemma á sunnudeginum með Baldri út í Flatey. Þar verður kannski hægt að semja við Hafstein bónda um siglingu um Vestureyjar en þangað hef ég ekki komið frá því ég var níu ára gamall. Ferðin endar seint um kvöld í Stykkishólmi og því ekki um annað að ræða en að gista þar aftur." En hvernig er helgin í raunveruleikanum? "Ég hugsa að ég eyði helginni bara heima í rólegheitum við skriftir en ég er að vinna að nýrri glæpasögu. Þó er aldrei að vita nema fótboltinn freisti mín," segir Viktor að lokum.