María Gréta Einarsdóttir hóf störf sem verslunarstjóri Sautján ekki alls fyrir löngu.
„Ég byrjaði að vinna hjá NTC fyrir fjórum árum og hef flakkað á milli búða síðan. Í fyrstu var ég verslunarstjóri Smash á Laugavegi en síðar opnaði Jeans á sama stað og þar hélt ég áfram. Síðan hefur þetta undið uppá sig og í mars síðastliðnum fór ég yfir í Sautján,“ segir María sem varð landanum kunnug þegar hún stjórnaði tónlistarþætti fyrsta starfsvetur Skjás eins.
„Þetta er fjölbreytt vinna, ég er líka í innkaupum og skrepp til útlanda á sýningar að velja föt í búðina. Þá erum við ýmist að kaupa vörur fram í tímann eða það sem vantar hverju sinni. Tvisvar á ári förum við nokkur frá fyrirtækinu á stóra sýningu í Kaupmannahöfn og í Düsseldorf er haldin skósýning á hálfs árs fresti. Svo er stundum farið í styttri ferðir, til dæmis til London og Parísar.“
María segist fylgjast vel með tískustraumum enda er það partur af hennar starfi. Auk þess hefur hún umsjón með ýmsu tengdu daglegum rekstri verslunarinnar í Kringlunni.
„Ég sé um starfsmannahald, geri upp og mér finnst líka gaman að vera úti á gólfi að selja.“
María viðurkennir aðspurð að hún sé algjört fatafrík.
„Ég á mest af skóm og gallabuxum, það er lítið annað hægt en að kaupa mikið af fötum þegar maður vinnur hérna. Annars finnst mér líka rosalega gaman að kaupa föt í útlöndum, kíkja í H&M og second hand búðir.“
