Staðan nú allt önnur

Björn Bjarnason, dómsmálaráðherra, segir að staðan nú sé allt önnur, en þegar hann sagði það vera brellu að afturkalla fjölmiðlalögin. Eftir að ljóst varð að ekki yrði af þjóðaratkvæðagreiðslu, heldur lagt fram nýtt fjölmiðlafrumvarp, hefur mikið verið vitnað í orð Björns Bjarnasonar dómsmálaráðherra, sem hann skrifaði á heimasíðu sína þriðja júní síðastliðinn. Þar segir Björn: "Ég sé, að vísu, að Sigurður Líndal, fyrrverandi prófessor, sem helst hefur lagt sig fram um að lýsa yfir persónulegu valdi forseta til að skjóta málum til þjóðarinnar, lætur nú eins og alþingi geti bara breytt lögunum og þannig komist hjá því, að þjóðin segi álit sitt á þeim. Ef slíkum brellum yrði beitt, er ég hræddur um, að einvers staðar myndi heyrast hljóð úr horni." Nú segir Björn Bjarnason að þar sem lögin hafi verið afturkölluð og ný lög sett, svo og að ákveðið hefur verið að fresta gildistöku, sé allt önnur staða komin á málið. Þá hafi komið í ljós á þeim mánuði sem liðinn er frá því hann skrifaði á heimasíðu sína að mikill ágreiningur væri um þjóðaratkvæðagreiðsluna og því hefði ríkisstjórnin leitað annarra leiða.