Gay pride ball á Nasa

"Þetta er fyrst og fremst upphitunarpartí fyrir homma, lesbíur og vini þeirra," segir plötusnúðurinn Páll Óskar en í kvöld verður haldið styrktarball á Nasa þar sem miðasalan rennur óskipt til styrktar Hinsegin dögum í Reykjavík. "Gay Pride hátíðin er öll unnin í sjálfboðavinnu og við þiggjum hverja krónu með þökkum. Þetta byrjaði sem lítil eftirmiðdags skemmtun á Ingólfstorgi en hefur þróast út í að verða litskrúðugasta karnival Reykjavíkurborgar með skrúðgöngu og öllu tilheyrandi. Gangan í ár verður farin laugardaginn 7. ágúst og undirbúningurinn hefst í kvöld. Þessi hátíð hefur þá sérstöðu fram yfir aðrar Gay pride hátíðir í heiminum að fjölskyldur og vinir samkynhneigðra taka fullan þátt. Það er einmitt mergurinn málsins því samkynhneigð er ekkert einkamál samkynhneigðra og við viljum að sjálfsögðu fagna okkar tilfinningalega frelsi með okkar nánustu." Á styrktarballinu á Nasa í kvöld kennir ýmissa grasa. "Hommaleikhúsið Hégómi stígur á stokk en svo ætlar dragdrottning allra landsmanna, Skjöldur Eyfjörð eða Míó eins og hún vill láta kalla sig, að frumflytja Gay Pride lagið í ár. Skjöldur sér líka um allt sjálfur, saumar búninga, hannar gervi og gefur allt í verkið. Það verður án efa hátíðleg athöfn þegar lagið verður frumflutt í kvöld," segir Páll Óskar en hann verður plötusnúður kvöldsins. "Ég held uppi stuðinu á Nasa langt fram eftir nóttu, verð fyrsti maðurinn inn í húsið og síðasti maðurinn út."