Fundi ríkisstjórnar lokið

Davíð Oddsson sagðist hress eftir ríkisstjórnarfund sem haldinn var í morgun. Hann telur að allir séu sammála um það, fyrir utan þá sem eru hrein handbendi aðila útí bæ, að setja verði lög um fjölmiðla þó það verði gert síðar. Guðni Ágústsson, varaformaður Framsóknarflokksins, segir engan standa uppi sem sigurvegari í fjölmiðlamálinu. Ríkisstjórnin ræddi í morgun ákvörðun um að draga fjölmiðlafrumvarpið til baka. Halldór Ásgrímsson, formaður Framsóknarflokksins, var ekki á fundinum af persónulegum ástæðum. Fundi ríkisstjórnarinnar lauk um hádegið, en hann hófst klukkan hálftíu. Á fundinum var kynnt sú ákvörðun formanna stjórnarflokkanna, að afturkalla fjölmiðlalögin, sem samþykkt voru frá Alþingi í maí síðastliðnum og forseti Íslands synjaði staðfestingar, og einnig draga til baka fjölmiðlafrumvarpið, sem allsherjarnefnd hefur til umfjöllunar. Þar með er ljóst að lög um eignarhald á fjölmiðlum falla alfarið úr gildi og hefst vinna við nýtt lagafrumvarp eftir að þing kemur saman að nýju í haust. Jafnframt er ákveðið að engin þjóðaratkvæðagreiðsla fari fram, þar sem þau verða felld úr gildi. Samhliða þessari ákvörðun hafa stjórnarflokkarnir ákveðið að fella synjunarvald forseta á lagafrumvörpum úr gildi og er stefnt að því að leggja fyrir Alþingi þingsályktunartillögu um breytingu á 26. grein stjórnarskrárinnar. Í nýja frumvarpinu eru í raun aðeins tvö ákvæði. Annars vegar að fella fjölmiðlalögin frá 24. maí úr gildi, enda þótt forseti hefði þegar vísað þeim til þjóðarinnar, og hinsvegar breytingar á útvarpsréttarnefnd, sem menntamálaráðherra hefur kynnt og á að gera nefndina faglegri og óháðari.