Hjólað án lífshættu

"Ég hjóla mikið og er búinn að gera það í mörg ár, en það er eitthvað sem maður vandist á í Danmörku, og ég hjóla nánast alltaf til og frá vinnu," segir Guðmundur Ólafsson leikari aðspurður hvernig hann haldi sér í formi. "Maður er ótrúlega fljótur að hjóla á milli staða og aðstæður hafa breyst mikið hér þannig að hægt er að hjóla um án þess að vera í mikilli lífshættu," segir Guðmundur sem alla tíð hefur verið mikið í íþróttum og er meðal annars menntaður íþróttakennari og var einnig keppnismaður á skíðum. Líkamsrækt og hreyfing er lífsstíll sem honum er eðlilegur. Ég hef spilað fótbolta frá því að ég var krakki og ætla að vera í fótbolta þar til ég hrekk upp af," segir Guðmundur hlæjandi, en á sumrin hittir hann hóp félaga sinna reglulega og spilar með þeim bolta á Klambratúni. "Jú, svo hleyp ég svona við og við en það hefur heldur dregið úr því svona síðustu árin," segir Guðmundur kankvís. Guðmundur þarf einnig að halda sér í formi vegna starfs síns og sækir hann söngtíma reglulega. "Ég er alltaf í söngtímum og það er hluti af því að halda sér almennt í formi," segir Guðmundur sem undirbýr sig nú sérstaklega fyrir sýningu sína Tenórinn í Iðnó.