Hákon Eydal ákærður fyrir morð

Hákon Eydal hefur verið ákærður fyrir að myrða Sri Ramahwati í júlí í sumar. Ríkissaksóknari krefst þess að hann verði dæmdur til þyngstu refsingar. Frá þessu var greint í fréttum Sjónvarpsins í kvöld. Lík Sri Ramawhati fannst í hraungjótu skammt frá Hafnafirði þann 3. ágúst eftir umfangsmikla leit. Hákon hafði áður játað að hafa banað henni en sagði lögreglu í fyrstu að hann hefði losað sig við líkið í sjóinn á Kjalarnesi. Krufning leiddi í ljós að Sri hafði látist af völdum höfuðáverka, sem Hákon veitti henni, en í hraungjótunni fannst meðal annars kúbein. Ákæran á hendur Hákoni verður þingfest í Héraðsdómi Reykjavíkur á fimmtudaginn.