Þrír teknir með 160 grömm af hassi

Þrír menn voru handteknir með 160 grömm af hassi og nokkur grömm af amfetamíni við Hvalfjarðargöngin um tvöleytið aðfaranótt miðvikudags. Að sögn lögreglunnar á Akranesi þótti lögreglumönnum ástæða til að stöðva bílinn þegar hann kom úr göngunum og við leit í honum fundust fíkniefnin en talið er að þau hafi verið ætluð til sölu. Mennirnir voru á leiðinni á Akureyri og munu allir vera þaðan. Sá yngsti þeirra er sautján ára, annar tvítugur og sá þriðji tæplega þrítugur og hafa allir komið við sögu lögreglu áður. Mönnunum var sleppt að lokinni yfirheyrslu og málið er í rannsókn.