Hmam markahæstur á HM

Stórskyttan Wissen Hmam frá Túnis varð markahæsti leikmaður heimsmeistaramótsins í handbolta í Túnis sem lauk í gær. Hmam skoraði ellefu mörk fyrir Túnis í tapleiknum gegn Frökkum um þriðja sætið í gær og komst þar með upp fyrir rússneska hornamanninn Eduard Kokcharov. Hmam skoraði 81 mark í tíu leikjum en Kokcharov skoraði 80 mörk í níu leikjum. Króatíski leikstjórnandinn Ivano Balic var valinn bestur en hann var einnig valinn bestur á síðasta heimsmeistaramóti í Portúgal fyrir tveimur árum. Balic lék lykilhlutverk í liði Króata og var yfirburðamaður í báðum leikjum helgarinnar.