Launaskrið í raun lítið

Laun hækkuðu um 6,6 prósent síðustu tólf mánuði, miðað við janúar. Á sama tíma hækkaði verðlag um fjögur prósent og kaupmáttur jókst um 2,5 prósent samkvæmt nýjustu tölum Hagstofu Íslands. Eins og kemur fram á heimasíðu Alþýðusambands Íslands, asi.is, gefa þessar tölur ekki rétta mynd af launaþróun. Launaskrið er í raun lítið en það sem skýrir hækkun á launum er að á undanförnum árum hafa almennar launahækkanir verið í janúar á hverju ári. Í upphafi síðasta árs voru flestir samningar lausir og engar launahækkanir en á vormánuðum var gengið frá samningum á almennum markaði. Tveggja ára almennar launahækkanir koma því inn í þessa tólf mánaða mælingu. Ef upphafshækkun kjarasamninga er færð til 1. janúar á síðasta ári þá blasir annað við en þá étur verðbólgan upp meira en allar launahækkanir og kaupmáttur rýrnar.