Setur skilyrði við samruna

Samkeppnisráð hefur sett ítarleg skilyrði fyrir annars vegar samruna Landssíma Íslands og Íslenska sjónvarpsfélagsins, sem rekur Skjá einn og hins vegar samruna Og fjarskipta og 356 ljósvakamiðla, sem reka meðal annars Stöð 2 og Sýn. Fyrirtækin hafa sæst á að una skilyrðunum að því er fram kemur í fréttatilkynningu frá Samkeppnisstofnun. Að mati Samkeppnisráðs er samruni fyrirtækjanna talinn leiða til mikillar samþjöppunar á markaði sem geti útilokað aðra keppinauta frá honum og þar með skaðað hag neytenda til lengri tíma litið. Telja samkeppnisyfirvöld meðal annars að verði ekkert að gert sé hætta á að samþjöppunin styrki stöðu Landsímans og Og fjarskipta ennfrekar á fjarskiptamarkaði þar sem önnur fjarskiptafyrirtæki geti ekki tryggt sér aðgang að efni til dreifingar eftir sínum dreifikerfum. Samþjöppunin takmarki þannig möguleika nýrra keppinauta á að komast inn á fjarskipta-, sjónvarps- og útvarpsmarkaði og hætta sé á að valkostum neytenda fækki þar sem hin sameinuðu fyrirtæki eigi möguleika á að tvinna saman ýmsa þjónustu. Til að hindra að þetta gerist og tryggja jafnræði á markaði setja samkeppnisyfirvöld ítarleg skilyrði fyrir samruna fyrrgreindra fyrirtækja. 365 ljósvakamiðlum og Skjá einum er til dæmis gert að verða við öllum málefnalegum beiðnum fyrirtækja um að fá að dreifa sjónvarps- og útvarpsmerkjum fjölmiðlafyrirtækjanna í opinni og læstri sjónvarpsdagskrá. Þá er Landsímanum gert að veita öðrum en Skjá einum aðgang að dreifikerfum sínum fyrir sjónvarp og útvarp og til að tryggja að jafnræðis sé gætt ber fyrirtækinu að veita keppinautum sínum og keppinautum Skjás eins aðgang að upplýsingum varðandi grunnfjarskipta- og dreifingarþjónustu Landsímans. Einnig verður samrunafyrirtækjunum óheimilt að tvinna saman sölu á fjarskipta- og sjónvarpsþjónustu. Til að tryggja að upplýsingar fari ekki á milli Landsímans og Skjás eins annars vegar og Og Vodafone og 365 ljósvakamiðla hins vegar umfram það sem gerist milli fyrirtækjanna eru settar hömlur við stjórnarsetu í þeim. Úrskurð samkeppnisráðs vegna samruna Og fjarskipta hf., 365 ljósvakamiðla ehf. og 365 prentmiðla ehf. má finna hér:Úrskurð samkeppnisráðs vegna samruna Landssíma Íslands hf. og Íslenska sjónvarpsfélagsins hf. má finna hér:Fréttatilkynning Samkeppnisstofnunar: Samkeppnisráð setur víðtæk skilyrði fyrir samruna á fjarskipta- og fjölmiðlamörkuðum sem eiga að leiða til aukinnar samkeppni