Stjórnarflokkarnir ræða leikskóla

Óformlegar viðræður um gjaldfrjálsa leikskólagöngu fimm ára barna hafa farið fram milli ríkisstjórnarflokkanna. Hjálmar Árnason, þingflokksformaður Framsóknar, segir gjaldfrjálsan leikskóla lið í fjölskyldustefnu flokksins frá síðasta flokksþingi. Eftir eigi að útfæra hvort öllum börnum eða aðeins hluta þeirra verði í framtíðinni tryggður gjaldfrjáls leikskóli. "Það þarf að skoða út frá uppeldislegum sjónarmiðum með hagsmuni barnanna að leiðarljósi," segir Hjálmar. "Þegar til þess kemur þarf að ræða tekjuskiptingu ríkis og sveitarfélaga."