Sýslumaður samþykkti beiðni Kers

Sýslumaðurinn í Reykjavík samþykkti í dag beiðni Kers og fleiri hluthafa í Festingu ehf. um að setja lögbann við því að Angus hagnýti sér þann rétt sem fylgir hlutafjáreign félagsins í Festingu. Jafnframt var lagt lögbann við því að Angus gæti framselt hluti sína til þriðja aðila. Lögbannið tekur gildi síðar í dag þegar lögð hefur verið fram 75 milljóna króna trygging af hálfu Kers.Kristján Loftsson, formaður stjórnar Kers, segist fagna þessari niðurstöðu. „Þetta er áfangasigur. Næsta skref okkar verður að höfða mál til ógildingar á hlutafjárhækkuninni í Festingu frá 18. mars sl. og jafnframt til staðfestingar á lögbanninu,“ segir Kristján. „Við munum nú strax fara fram á það við stjórn Festingar að hún boði til hluthafafundar til að kjósa nýja stjórn í félaginu. Við vonum að stjórnin bregðist hratt og vel við þeirri beiðni,“ segir Kristján. Upphaf málsins var í síðasta mánuði þegar stjórn Festingar ákvað að auka hlutafé félagsins um hundrað prósent og seldi Angusi hlutina án þess að halda hlutahafafund eins og óskað hafði verið eftir. Lögbannið nú mun því frysta hlut Angusar á meðan leitt verður til lykta fyrir dómstólum hvort hlutafjáraukningin hafi verið lögleg. Ekki var fallist á beiðni Kers um að leggja lögbann við því að Landsbanki Íslands hagnýti sér þann rétt sem fylgir handveðsyfirlýsingu er Angus hefur gefið út til bankans vegna lánafyrirgreiðslu við kaup umræddra bréfa. Að áliti sýslumanns hafði ekki verið sýnt fram á að slík athöfn væri yfirvofandi af hálfu bankans.