Reynum að sinna öllum

"Eins og ástandið er núna finnst mér það líta betur út núna en í fyrra," segir Selma Árnadóttir, forstöðukona Vinnumiðlunar ungs fólks í Reykjavík, um atvinnuástandið í sumar. "Því miður eru það þó alltaf þau sem eru 17 ára sem standa út af borðinu því eftir að sjálfræðisaldurinn var færður upp í 18 er auglýst eftir fólki sem er 18 ára og eldra í sumarstörf á almennum vinnumarkaði. Auk þess geta þau ekki fengið vinnu í Vinnuskólanum því hann er fyrir börn á aldrinum 14 til 16 ára," segir Selma. Hún segir það þó vera á ábyrgð samfélagsins að taka á þessu máli og vonast til þess að fyrirtækin séu vakandi fyrir þessu vandamáli og ráði til sín yngra fólk í sumarvinnu. "Við erum með ungt fólk á skrá frá 17 ára aldri og útdeilum því í sumarstörf til borgarstofnana eins og ÍTR, Gatnamálastofu og bókasafnanna svo dæmi séu tekin. Hins vegar eru sum störfin þess eðlis að sóst er eftir reynslu og ef um nægilegt vinnuafl er að ræða eru það frekar þeir eldri sem fá störfin," segir Selma. Hún vill þó meina að þessar stofnanir fríi sig ekki ábyrgð og séu meðvitaðar um nauðsyn þess að hleypa þeim yngri að. Skráning hjá Vinnumiðlun ungs fólks lýkur 30. apríl næstkomandi og um miðjan maí hefur flestum störfum verið ráðstafað. "Það er opið hjá okkur allt árið um kring og í raun hægt að skrá sig hvenær sem er, en eftir þennan tíma eru líkurnar á að fá starf ekki miklar," segir Selma. "Því miður fá aldrei allir vinnu en við gerum auðvitað okkar besta til að útvega sem flestum starf," segir Selma.