Fær harðsperrur af hlátri

"Ég er eiginlega ekki í neinu formi. Ég er ekki í slæmu formi en ég spái voðalega lítið í þessa hluti," segir Bjarni sem heldur sér glöðum og hressum með því að hlæja og grínast. "Ég er með geðveika magavöðva út af öllum hlátrasköllunum. Þegar ég hitti Pétur vin minn þá hlæjum við rosalega mikið og við erum eiginlega alveg að springa. Það tekur rosalega á. Ég fæ verk í magann og það myndast þrýstingur í hausinn þannig að ég er eiginlega alveg búinn eftir það. Það er æðislegt. Þá er ég rosalega glaður yfir daginn og finnst eins og ég hafi hreyft mig rosalega mikið enda fæ ég hálfgerðar harðsperrur." Bjarni var mikill íþróttagarpur þegar hann var yngri en þegar aldurinn færðist yfir hann var það allt í einu ekkert voðalega flott. "Ég var bæði í fótbolta og borðtennis og síðan fékk ég bara unglingaveikina. Ég á reyndar nokkra verðlaunapeninga fyrir bæði þannig að ég hef þetta í mér," segir Bjarni sem rifjar stundum upp gamla fótboltatakta. "Ég reyni að fara einu sinni í viku í fótbolta á sumrin og út að skokka þess á milli. Bara til að byggja upp þol." "Mér finnst fínt að fá mér fisk einu sinni í viku en svo fæ ég mér alltaf Eldsmiðjupítsu eftir skrall um helgar. Það er bara eins og heróín -- eitthvað sem ég þarf að fá. Síðan erum við með gott mötuneyti uppi í vinnu sem er mjög gott," segir Bjarni um mataræðið.