Frelsisáskrift Vodafone í útlöndum

Og Vodafone hefur tekið í notkun Ferðafrelsi, nýja þjónustu fyrir Frelsis viðskiptavini fyrirtækisins sem eru á leið til útlanda. Frelsis notendur þurfa ekki að gerast áskrifendur til þess að nota þjónustuna heldur einungis að skrá sig í Ferðafrelsi Og Vodafone. Þannig geta þeir hringt úr Frelsis númeri og fyllt á inneign á meðan dvöl þeirra í útlöndum stendur yfir. Ekki þarf að greiða neitt mánaðargjald í Ferðafrelsi. Hægt er að skrá sig á vefsvæði Og Vodafone, með því að hringja í þjónustuverið í síma 1414 eða koma við í einni af verslunum fyrirtækisins. Notendur fá sent SMS þegar Ferðafrelsi er orðið virkt. Notendur í Ferðafrelsi geta hringt gjaldfrjálst í þjónustunúmer Og Vodafone frá útlöndum. Þeir geta fylgst með inneign með því að hringja í 1400 (hringt í *111*1400#), í 1414 (hringt í *111*1414#) til þess að fá almennar upplýsingar hjá þjónustuveri eða talhólf í síma 1415 (hringt í *111*1415#). Notkun erlendis er dregin af inneign. Notendur geta fyllt á Ferðafrelsi með hleðslukortum frá Og Vodafone, fyllt á inneign í gegnum heimabanka, með kreditkorti á www.ogvodafone.is eða með GSM greiðslu ef sú þjónusta er fyrir hendi. "Þessi þjónusta er í raun bylting fyrir Frelsis notendur Og Vodafone því þeir geta nú notað GSM númerið sitt í útlöndum. Þeir þurfa ekki að gerast áskrifendur til þess að hringja á meðan þeir eru staddir utan lands. Það nægir að skrá sig í Ferðafrelsi til þess að geta nýtt sér þjónustuna," segir Sverrir Hreiðarsson, markaðstjóri Og Vodafone.  GSM notendur með Ferðafrelsi Og Vodafone þurfa að hafa náð 18 ára aldri til þess að eiga kost á að nota þjónustuna. Hægt er að fá nánari upplýsingar á www.ogvodafone.is, með því að hringja í 1414 eða í verslunum Og Vodafone.