28 landsliðskonur á ferðinni

Það verður nóg að gera hjá íslensku kvennalandsliðunum í handbolta um helgina en tvö landslið spila þá fimm landsleiki, A-liðið mætir Hollendingum í þremur leikjum og 20 ára liðið fer til Færeyja og spilar tvo leiki við heimamenn. Allir leikirnir koma til með að telja sem A-landsleikir. Þar sem þessi tvö verkefni rekast á hefur Stefán Arnarson, landsliðþjálfari kvenna í handknattleik, valið 28 leikmenn til þess að taka þátt í þessum fimm leikjum og af þessum 28 stelpum eru tólf nýliðar að takast á við sitt fyrsta A-landsliðsverkefni. Spilað verður á móti Færeyjum dagana 21. maí og 22. maí í Færeyjum og hefur Stefán fengið Alfreð Örn Finnsson, þjálfara ÍBV, til þess að stýra þeim hópi, ásamt Óskari Bjarna Óskarsyni, þjálfara Vals, en í því liði eru yngri leikmenn í aðalhlutverkum. A-landsliðið mun síðan mæta Hollandi í Ásgarði í Garðabæ í þremur leikjum dagana 22., 23. og 24. maí en frítt verður inn á alla leikina. Undanfarið ár hefur verið unnið markvisst starf með kvennalandsliðin og samkvæmt nýútgefnum lista EHF er Ísland komið í 18. sæti úr 34. á síðustu þremur árum og því verður gaman að sjá hvernig liðunum gengur um helgina. Eins og fram kemur í fréttatilkynningu frá HSÍ þá hefur hollenska landsliðið á að skipa mjög sterkum og leikreyndum leikmönnum, en þær spila flestar í toppliðum í Danmörku og Þýskalandi. Það er valinn leikmaður í hverri stöðu hjá hollenska liðinu og allir leikmenn liðsins eru hálaunaðir atvinnumenn í íþróttinni. Síðast þegar liðin mættust var spilað í Hollandi í október sl. og þar sigraði Holland í jöfnum leik með tveggja marka mun.