Banaslys í Hvalfirði

24 ára karlmaður beið bana í umferðarslysi í Hvalfirði í morgun. Slysið varð á níunda tímanum þegar flutningabíll og fólksbíll rákust saman skammt hjá Meðalfellsafleggjara í Hvalfirði, sunnan megin, og var flutningabíllinn á leið inn fjörðinn en fólksbíllinn út. Ökumennirnir voru einir í bílunum og var áreksturinn mjög harður og lést ökumaður fólksbílsins. Flutningabíllinn hafnaði utan vegar en bílstjóri hans slasaðist ekki. Vegurinn var lokaður í nokkurn tíma á eftir en hægt var að beina umferð um Eyrarfellsveg. Maðurinn sem lést var úr Reykjavík en ekki er unnt að greina frá nafni hans að svo stöddu.