Kynferðisbrotadómi áfrýjað

Ríkissaksóknari hefur áfrýjað til Hæstaréttar máli þar sem Héraðsdómur Norðurlands vestra sýknaði mann af kynferðisbroti gegn 10 ára gamalli systurdóttur hans. Dómurinn, sem var upp kveðinn í byrjun maí, klofnaði í málinu, en tveir dómarar sýknuðu manninn, meðan sá þriðji skilaði séráliti og vildi dæma hann í 10 mánaða fangelsi. Þegar meint brot átti sér stað, í júnímánuði árið 2003, var stúlkan í heimsókn hjá manninum og sjö ára gamalli dóttur hans og sváfu þau öll í sama rúmi. Búist er við dómi í málinu fyrir áramót, en það verður tekið fyrir í Hæstarétti eftir að réttarhléi lýkur í haust.