Lukkudráttur hjá Haukunum

Íslandsmeistarar Hauka duttu svo sannarlega í lukkupottinn er dregið var í forkepni meistaradeildar Evrópu. Liðið á greiða leið í riðlakeppnina en Haukar drógust gegn Berchem frá Lúxemborg en hvorki liðið né landið hafa verið hátt skrifuð í evrópskum handbolta. En þó svo að andstæðingurinn sé ekki sterkur er óhætt að segja að liðið sé ekki síst heppið hvað varðar ferðalagið en mörg lið frá austurhluta Evrópu voru í pottinum. Eitt slíkt drógst gegn Val í Evrópukeppni félagsliða. Þar er um að ræða lið frá höfuðborginni Tblisi í Georgíu, heimalands Rolands Eradze, landsliðsmarkvarðar og fyrrum markvarðar Vals. "Án þess að maður þekki mikið til í handboltanum í Lúxemborg má engu að síður gera ráð fyrir því að það væri varla hægt að fá auðveldari andstæðing," sagði Páll Ólafsson, þjálfari Hauka í gær. "Þetta ætti að veita okkur greiða leið í riðlakeppni meistaradeildarinnar, sem er okkar markmið. Við viljum helst ekki þurfa að taka þátt í forkeppninni en það var gott að við þurfum ekki að ferðast lengra fyrir þessa leiki nú." Dregið verður í riðlakeppnina í dag og kemur þá í ljós hvaða andstæðinga Haukar fá þar vinni þeir Berchem. Hjá konunum drógust Íslandsmeistarar Haukar gegn Pelplast Salerno frá Ítalíu í 1. umferð Evrópukeppni félagsliða og Stjörnustúlkur mæta tyrkneska liðinu Anadolou í 2. umferð Evrópukeppni bikarhafa. Allir leikirnir verða leiknir heima og að heiman og eru fyrri leikirnir á dagskrá þriðja eða fjórða september og þeir síðari viku síðar. Það á við í öllum keppnum nema hjá kvennaliði Stjörnunnar í 2. umferð Evrópukeppni bikarhafa. Þeir leikir fara fram í byrjun október. Íslandsmótið hefst 21. september næstkomandi.