Hugsanleg innherjaviðskipti skoðuð

Kauphöll Íslands skoðar hvort innherjaviðskipti hafi farið fram í FL Group síðustu daga, en veruleg viðskipti voru með bréf í félaginu í gær og hækkaði gengi þeirra um fjögur prósent. Hagnaður félagsins á fyrstu sex mánuðum ársins nam 2,3 milljörðum króna og er þetta mesti hagnaður þess frá upphafi. Það sem þykir óvenjulegt er að bréf FL group hækkuðu um tæp fjögur prósent í gær, rétt áður en tilkynnt var um met afkomu fyrirtækisins. Þórður Friðjónsson forstjóri Kauphallarinnar segir að málið verði skoðað rækilega. Hann segir að þegar verði óvenjulegar og snöggar hreyfingar eins og urðu í gær hjá Flugleiðum þá er vandlega farið yfir málið og reynt að greina það eftir bestu getu. Hann vildi ekki segja um hvort að rökstuddur grunur væri fyrir því að innherjaviðskipti ættu sér stað fyrr en búið væri að skoða málið. Hann benti líka á að verðið hefði lækkað aftur í morgun. Velta FL Group og fjórtán dótturfyrirtækja var 20,1 milljarður króna og jókst um 6,4 prósent frá sama tíma á síðasta ári. Í tilkynningu frá félaginu segir að þessa góðu afkomu megi fyrst og fremst rekja til mikils árangurs af fjárfestingastefnu félagsins. FL group á meðal annars hlutabréf í breska lággjaldaflugfélaginu Easy Jet, Íslandsbanka og KB banka.   - þarna var rætt við Þórð Friðjónsson forstjóra Kauphallarinnar.