Þrír fengu skilorð

Þrír ungir menn um og yfir tvítugt voru í gær dæmdir fyrir innbrot í tölvuverslun þar sem þeir stálu vörum fyrir tæpar 600 þúsund krónur. Sá sem þyngstan dóm hlaut var dæmdur til sex mánaða fangelsisvistar, en hinir tveir í þriggja mánaða fangelsi. Dómarnir voru allir skilorðsbundnir í þrjú ár. Sá sem þyngstan dóminn hlaut er jafnframt elstur í hópnum, en hann var auk innbrotsins ákærður fyrir vörslu kannabisefna og amfetamíns. Þá hafði hann í tvígang verið gripinn fyrir að aka bíl próflaus. Dómurinn var kveðinn upp í Héraðsdómi Reykjavíkur.