Var nýkominn úr síbrotagæslu

Fimm karlmenn eru í haldi lögreglunnar grunaðir um mannrán á Seltjarnarnesi í gær. Höfuðpaur ránsins hafði nýverið verið sleppt úr síbrotagæslu vegna þjófnaðarmála. Fimmeningarnir komu að verslun Bónuss á Seltjarnarnesi. Þrír þeirra fóru inn en tveir biðu úti í bíl. Þeir neyddu starfsmann verslunarinnar með sér út í bíl, settu hann í farangursgeymsluna og óku á brott. Þeir óku með hann að hraðbanka þar sem þeir neyddu hann til að taka út 30 þúsund krónur, tóku féð af honum og slepptu honum í kjölfarið. Sá sem talinn er höfuðpaur ránsins er nýlaus úr síbrotagæslu vegna þjófnaðarmála og liðu aðeins nokkrar klukkustundir frá því hann var laus þar til manninum var rænt á Seltjarnarnesi. Fórnarlambið segir að sér hafi verið ógnað með skotvopni. Málið er í rannsókn og verst lögreglan frekari frétta af því en búast má við að ákvörðun um gæsluvarðhaldskröfu yfir einum eða fleirum hinna handteknu verði tekin síðar í dag.