Slasaðist þegar fjórhjól valt

Maður slasaðist þegar fjórhjólið hans valt í Svínahrauni í dag. Þyrla Landhelgisgæslunnar var kölluð út til að flytja hann á sjúkrahús. Hópur manna var á fjórhjólum í Svínahrauni rétt við Litlu kaffistofuna í morgun. Þeir keyrðu í einfaldri röð og leið þeirra lá yfir lækjarsprænu þar sem var töluverð ójafna. Kristinn Gíslason, ein ferðalanganna, segir að félagi hans hafi kastast til í brekku við sprænuna og í kjölfarið kastast af hjólinu og viðbeinsbrotnað. Landsveit slökkviliðs höfuðborgarsvæðisins fór á slysstað og þar sem slysið varð í vegleysum og maðurinn mjög kvalinn var ákveðið að leggja ekki á hann að fara í sjúkrabíl með tilheyrandi veltingi og því var þyrla Landhelgisgæslunnar kölluð út. Félagar hins slasaða vilja koma á framfæri kæru þakklæti til björgunarmanna sem þeir segja að hafi verið skotflljótir á vettvang og staðið vel að verki.